ઈસ્તાંબુલથી ટ્યુનિશિયા જઈ રહેલા ટર્કિશ એરલાઇન્સના એક વિમાનમાં ગત 10 સપ્ટેમ્બરના રોજ હવામાં મોટી દુર્ઘટના થતા સહેજમાં અટકી હતી. ટ્યૂનિસ-કાર્થેજ ઇન્ટરનેશનલ એરપોર્ટ પર જ્યારે આ ફ્લાઇટ લેન્ડિંગ કરી રહી હતી ત્યારે અચાનક ભારે તોફાન અને ભયાનક ટર્બુલન્સનો શિકાર બની હતી. ખરાબ હવામાન વચ્ચે વિમાન હચમચી ઉઠતા અંદર બેઠેલા તમામ પ્રવાસીઓના જીવ તાળવે ચોંટી ગયા હતા અને ડરના માર્યા ચારેતરફ ચીસાચીસ થવા લાગી હતી.

આ ડરામણી ઘટનાનો વીડિયો તેમાં પોતાની માતા સાથે મુસાફરી કરી રહેલા એક પ્રવાસીએ સોશિયલ મીડિયા પર શેર કર્યો છે. તેમના જણાવ્યા અનુસાર સમગ્ર ઉડાન દરમિયાન બધું સામાન્ય હતું, પરંતુ લેન્ડિંગ સમયે અચાનક મુશ્કેલીઓ શરૂ થઈ ગઈ હતી. પાયલટે ટ્યૂનિસ-કાર્થેજ એરપોર્ટના રનવે પર વિમાનને ઉતારવા માટે એક-બે નહીં પરંતુ ત્રણ વખત પ્રયાસ કર્યા હતા, જોકે પ્રત્યેક વખતે પ્લેન ભયજનક રીતે હલી રહ્યું હતું.

ત્રીજી વખત જ્યારે વિમાન નીચે ઉતારવાની કોશિશ કરવામાં આવી ત્યારે પરિસ્થિતિ વધુ ગંભીર બની ગઈ હતી અને પ્લેન જાણે હવામાં ફ્રી-ફોલ થતું હોય તેમ અચાનક નીચે તરફ પડવા લાગ્યું હતું. વાતાવરણ અત્યંત પ્રતિકૂળ હોવાથી એરપોર્ટ પર ઉતરાણ શક્ય ન બનતા પાયલટે પ્લેનને વિસ્તારની ઉપર જ રાખીને આકાશમાં ચક્કર લગાવ્યા હતા.

આખરે ટ્યૂનિસ-કાર્થેજ એરપોર્ટ પર લેન્ડિંગ કરવું અસંભવ જણાતા ફ્લાઇટને ત્યાંથી અંદાજિત 60 માઈલ દક્ષિણ દિશામાં આવેલા એનફિધા-હમ્મામેટ ઇન્ટરનેશનલ એરપોર્ટ તરફ ડાયવર્ટ કરવાનો નિર્ણય લેવાયો હતો. સદનસીબે આ વૈકલ્પિક એરપોર્ટ પર વિમાનનું સુરક્ષિત રીતે લેન્ડિંગ થતાં સૌએ રાહતનો શ્વાસ લીધો હતો. આ ભયંકર ઘટનામાં કોઈ પણ પ્રવાસીને ઈજા પહોંચી ન હતી, પરંતુ જીવલેણ જોખમ અને વારંવાર લેન્ડિંગના નિષ્ફળ પ્રયાસોએ લોકો માટે આ હવાઈ સફરને ક્યારેય ન ભુલાય તેવો બિહામણો અનુભવ બનાવી દીધી હતી.