ઈરાન સાથેના તમામ વેપાર અને નાણાકીય વ્યવહારો યુએઈએ હાલ પૂરતા સ્થગિત કરી દીધા છે. આ નિર્ણય એવા સમયે લેવામાં આવ્યો છે જ્યારે યુએઈએ ઈરાની દળો પર પોતાના તરફ બે બેલેસ્ટિક મિસાઈલ છોડવાનો આરોપ લગાવ્યો છે, જોકે ઈરાને આ દાવાને નકારી કાઢ્યો છે. યુએઈના વિદેશ મંત્રાલયે નિવેદનમાં જણાવ્યું હતું કે પ્રદેશમાં શાંતિ અને સુરક્ષાને નુકસાન પહોંચાડી રહેલા વધતા તણાવના જવાબમાં આ નિર્ણય લેવાયો છે અને ઈરાન સાથેના તમામ વેપાર, વ્યાવસાયિક લેવડદેવડ અને નાણાકીય વ્યવહારો આગામી સૂચના સુધી બંધ રહેશે.

મંગળવાર સાંજે યુએઈના વિવિધ વિસ્તારોમાં રહેતા લોકોને કટોકટી ચેતવણી મળી હતી. સત્તાવાળાઓએ દેશમાં મિસાઈલ ખતરાની ચેતવણી આપી હતી. સ્થાનિક સમય અનુસાર સાંજે 6.30 વાગ્યા બાદ આ ચેતવણી જાહેર કરવામાં આવી હતી, જોકે લગભગ 10 મિનિટ બાદ સ્થિતિ સુરક્ષિત હોવાનું પુષ્ટિ આપીને સત્તાવાળાઓએ ચેતવણી હટાવી લીધી હતી.

યુએઈના સંરક્ષણ મંત્રી શેખ હમદાન બિન મોહમ્મદ બિન રાશિદ અલ મક્તૂમે જણાવ્યું હતું કે દેશની હવાઈ સંરક્ષણ પ્રણાલીએ ઈરાનથી યુએઈ તરફ છોડવામાં આવેલી બે બેલેસ્ટિક મિસાઈલ શોધી કાઢી હતી. પ્રથમ મિસાઈલ યુએઈના પ્રાદેશિક જળની બહાર પડી હતી, જ્યારે બીજી મિસાઈલ પ્રાદેશિક જળની અંદર પડી હતી. બાદમાં સામે આવેલા અહેવાલો અનુસાર બંને મિસાઈલ યુએઈના દરિયાઈ નૌવહન ક્ષેત્રને નિશાન બનાવી રહી હતી અને સમુદ્રમાં પડી હતી.

સત્તાવાળાઓએ જણાવ્યું હતું કે દુબઈ અને દેશના અન્ય વિસ્તારોમાં સંભળાયેલો અસામાન્ય અવાજ હવાઈ સંરક્ષણ કામગીરીને કારણે થયો હતો. મિસાઈલના ખતરાને પહોંચી વળવા માટે આ કામગીરી કરવામાં આવી રહી હતી.