કીવઃ યુક્રેને સોમવારે રશિયાના નિઝનેકામસ્ક શહેરને નિશાન બનાવી મોટા પાયે ડ્રોન હુમલો કર્યો હતો. તાતારસ્તાન ક્ષેત્રના અધિકારીઓના જણાવ્યા મુજબ હુમલામાં એક બાળક સહિત 13 લોકોનાં મોત થયા હતા, જ્યારે 48 લોકો ઘાયલ થયા હતા. તાતારસ્તાનના વડા રુસ્તમ મિન્નિખાનોવની પ્રેસ સર્વિસે જણાવ્યું હતું કે સોમવારે સવારે નિઝનેકામસ્કમાં ઔદ્યોગિક અને નાગરિક સુવિધાઓને નિશાન બનાવીને હુમલો કરવામાં આવ્યો હતો.

અધિકારીઓએ જોકે ડ્રોન હુમલામાં કયા ચોક્કસ સ્થળોને નિશાન બનાવવામાં આવ્યા હતા તેની માહિતી આપી નથી. નિઝનેકામસ્ક રશિયાનું મહત્ત્વનું તેલ રિફાઇનિંગ કેન્દ્ર છે, જ્યાં 2 રિફાઇનરી અને 1 પેટ્રોકેમિકલ પ્લાન્ટ આવેલા છે. નિઝનેકામસ્ક યુક્રેનની સરહદથી લગભગ 1200 કિલોમીટર પૂર્વમાં આવેલું છે.

છેલ્લા કેટલાક મહિનાઓથી યુક્રેન લગભગ દરરોજ લાંબા અંતરના ડ્રોન વડે રશિયાની તેલ સુવિધાઓને નિશાન બનાવી રહ્યું છે. આ હુમલાઓને કારણે રશિયામાં ઇંધણની અછત સર્જાઈ છે. યુક્રેનના પ્રમુખ વોલોડિમિર ઝેલેન્સકીના જણાવ્યા મુજબ રશિયન પ્રમુખ વ્લાદિમીર પુતિનને વાટાઘાટોના મેજ પર લાવવા અને 4 વર્ષથી વધુ સમયથી ચાલી રહેલા રશિયન આક્રમણને રોકવા માટે આ અભિયાન ચલાવવામાં આવી રહ્યું છે.

હુમલા અંગે યુક્રેનિયન અધિકારીઓએ તાત્કાલિક કોઈ ટિપ્પણી કરી ન હતી. રશિયાના તાતારસ્તાન ક્ષેત્રના અધિકારીઓએ હુમલાની જાણકારી આપતાં ઔદ્યોગિક અને નાગરિક સુવિધાઓને નિશાન બનાવવામાં આવી હોવાની માહિતી આપી છે, પરંતુ કયા સ્થળે કેટલું નુકસાન થયું તેની વિગત જાહેર કરી નથી.