અમેરિકાના રાષ્ટ્રપતિ ડોનાલ્ડ ટ્રમ્પે હોર્મુઝ સ્ટ્રેટમાં અમેરિકાના અપાચે હેલિકોપ્ટરને તોડી પાડવાનો ઈરાન પર આરોપ લગાવ્યા બાદ મંગળવારે ઈરાન સામે સૈન્ય કાર્યવાહી શરૂ કરી દીધી હતી. બીજી તરફ, ઈરાને અપાચે હેલિકોપ્ટર તોડી પાડવાનો ઇનકાર કરીને દાવો કર્યો હતો કે અમેરિકા આ ઘટનાનું બહાનું બનાવીને તેમના પર હુમલા કરી રહ્યું છે. માહિતી અનુસાર, હેલિકોપ્ટર દુર્ઘટના બાદ અમેરિકી નૌસેનાના એક ડ્રોન બોટ ઓપરેશને ક્રૂના બંને સભ્યોને સુરક્ષિત બચાવી લીધા હતા. શરૂઆતમાં આ દુર્ઘટના પાછળના કારણોની તપાસ કરવામાં આવી રહી હતી, પરંતુ ત્યારબાદ રાષ્ટ્રપતિ ટ્રમ્પે સીધો ઈરાન પર હેલિકોપ્ટર તોડી પાડવાનો આરોપ લગાવી દીધો હતો.

અમેરિકી મીડિયાના અહેવાલો મુજબ, અધિકારીઓએ જણાવ્યું હતું કે ઈરાન પર હુમલાનો ત્રીજો તબક્કો શરૂ થઈ ગયો છે અને આ સૈન્ય કાર્યવાહી હજી પણ ચાલુ છે. એક અમેરિકી અધિકારીએ જણાવ્યું હતું કે તાજેતરમાં કરાયેલા આ હુમલા ઈરાનને માત્ર ચેતવણી આપવા માટે કરવામાં આવ્યા છે. વધુમાં તેમણે કહ્યું હતું કે આ હુમલાઓથી યુદ્ધનો અંત લાવવા માટે ચાલી રહેલી વાતચીત પર કોઈ અસર પડવાની આશંકા નથી.

અમેરિકાની સૈન્ય કાર્યવાહીના જવાબમાં હવે ઈરાને પણ અમેરિકી સૈન્ય મથકો પર હુમલા શરૂ કર્યા હોવાનો દાવો કર્યો છે. ઈરાનની ટોચની સંયુક્ત સૈન્ય કમાન ખતમ અલ-અંબિયાએ જણાવ્યું હતું કે, દક્ષિણ ઈરાનમાં અમેરિકાની આક્રમકતાના જવાબમાં આ વિસ્તારમાં આવેલા કેટલાક અમેરિકી સૈન્ય ઠેકાણાઓને નિશાન બનાવવામાં આવ્યા છે. ઈરાની મીડિયાના અહેવાલો મુજબ, દક્ષિણ ઈરાનના કેશમ ટાપુ અને સિરિક વિસ્તારમાં ધડાકાના અવાજ સંભળાયા હતા, જ્યારે બંદર અબ્બાસમાં પણ સતત કેટલાક વિસ્ફોટો થયા હતા. આ હુમલા બાદ ઈરાનના વિદેશ મંત્રી અબ્બાસ અરાગચીએ અમેરિકાને ખુલ્લી ચેતવણી આપી હતી કે જો અમેરિકા સુરક્ષિત રહેવા માંગતું હોય, તો તેણે ફારસની ખાડી વિસ્તારમાંથી બહાર નીકળી જવું જોઈએ.