તમિલનાડુના થેની જિલ્લામાં લોખંડી સુરક્ષા વચ્ચે જેલબ્રેકની ચોંકાવનારી ઘટના બની છે. થેની જેલના એક જ સેલમાં બંધ 17 કેદીઓ જેલ કર્મચારીઓ પર હુમલો કરી ફરાર થઈ ગયા છે. મોડી રાત્રે એક કેદીની તબિયત બગડી હોવાનું બહાનું કાઢીને તેઓએ ષડયંત્ર રચ્યું હતું. માનવતાના ધોરણે જેલકર્મીઓ તપાસ કરવા સેલમાં ગયા કે તરત જ કેદીઓએ હિંસક હુમલો કર્યો હતો. ત્યારબાદ સ્ટાફને બાનમાં લઈને તેઓ જેલની સુરક્ષા તોડીને નાસી છૂટ્યા હતા, જેના કારણે સમગ્ર વિસ્તારમાં ભારે દોડધામ મચી ગઈ છે.

પોલીસે તુરંત મોટા પાયે સર્ચ ઓપરેશન શરૂ કરીને ભાગી છૂટેલા 17 કેદીઓમાંથી એકને પકડી લીધો છે. દક્ષિણ ઝોનના IGP વિજયેન્દ્ર બિદારીએ આ વાતની પુષ્ટિ કરી છે. બાકીના 16 કેદીઓને પકડવા માટે તંત્ર દ્વારા 17 સ્પેશિયલ ટીમો બનાવવામાં આવી છે, જેઓ વિવિધ સ્થળોએ દરોડા પાડી રહી છે.

ફરાર થયેલા કેદીઓમાં લિંગમ, રાજા સિંગંધર, કરુપ્પસામી, સિલમ્બરસન, તિરુપતિ, મેંજીસુંદરમ, સબરી, પોન મુથુ, નિજાંત, કાર્તિક રાજા, મુગિલન, સેલ્વા, તરુણ, રાજકુમાર, પ્રવીણ, મુથુ ઇલંગો અને રાજુવીનનો સમાવેશ થાય છે. પોલીસે આ તમામના ફોટોગ્રાફ્સ તૈયાર કરી તમામ પોલીસ સ્ટેશનો, હાઈવે પેટ્રોલિંગ ટીમો અને સરહદી ચેકપોસ્ટો પર મોકલી આપ્યા છે.

કેદીઓ બીજા જિલ્લામાં ન ભાગી જાય તે માટે આસપાસના વિસ્તારોમાં સુરક્ષા સઘન કરી દેવામાં આવી છે. ખાસ કરીને ઇડુક્કી, મદુરૈ અને દિંડીગુલ જિલ્લાના પોલીસ તંત્રને હાઈ એલર્ટ પર મુકાયું છે અને 16 સ્થળોએ ચેકપોસ્ટ ઉભી કરવામાં આવી છે.