આફ્રિકન દેશ ઈથોપિયામાં એક મોટી દુર્ઘટના સર્જાઈ છે. અહીં ટ્રક પુલ પરથી નદીમાં નીચે ખાબકતા 64 લોકોના ઘટનાસ્થળે જ મોત થયા છે, જ્યારે 2 લોકોના હોસ્પિટલમાં સારવાર દરમિયાન મોત થયા છે.

ટ્રકમાં સવાર લોકો લગ્ન પ્રસંગમાં હાજરી આપવા જઈ રહ્યા હતા, ત્યારે આ ગોઝારો અકસ્માત સર્જાયો હતો. ટ્રક જૂની અને જર્જરિત હાલતમાં હતી, જેના કારણે પુલ પસાર કરતી વખતે તેણે સંતુલન ગુમાવ્યું હતું અને નદીમાં પડી હતી. સ્થાનિક ગ્રામજનોએ જણાવ્યું કે આ વિસ્તારમાં અગાઉ પણ અનેક અકસ્માતો થયા છે.

રાહત અને બચાવ કામગીરીમાં સમય લાગતા સ્થિતિ વધારે ગંભીર બની હતી. ઘાયલ લોકોને તાત્કાલિક મદદ ન મળી, જેના કારણે મૃત્યુઆંક વધી ગયો અને ગંભીર રીતે ઘાયલ દર્દીઓને સારી સારવાર માટે મોટી હોસ્પિટલોમાં મોકલવામાં આવ્યા છે. સ્થાનિક લોકોના જણાવ્યા અનુસાર પુલ અને આસપાસના રસ્તાઓ ખૂબ જ ખરાબ હાલતમાં છે. તેમણે અગાઉ પણ આ જગ્યાને સુરક્ષિત બનાવવા માટે લોકોએ માગ કરી હતી, પરંતુ કોઈ કાર્યવાહી કરવામાં આવી ન હતી.