નોકરી માટે જમીન કૌભાંડ મામલે સીબીઆઈ આજે બિહારના ડેપ્યુટી સીએમ તેજસ્વી યાદવની પૂછપરછ કરશે. આ કેસમાં સ્પેશિયલ કોર્ટે લાલુ પરિવારના સભ્યો સહિત તમામ 16 આરોપીઓને પહેલા જ જામીન આપી દીધા છે. તાજેતરમાં જ સીબીઆઈએ રાષ્ટ્રીય જનતા દળ (આરજેડી)ના પ્રમુખ લાલુ પ્રસાદ યાદવ અને તેમની પત્ની એટલે કે પૂર્વ સીએમ રાબડી દેવીની પણ પૂછપરછ કરી હતી. અગાઉ પણ સીબીઆઈ દ્વારા તેજસ્વી યાદવને હાજર થવા માટે કહેવામાં આવ્યું હતું પરંતુ તેઓ તેમની પત્નીની તબિયત ખરાબ હોવાને કારણે હાજર થયા ન હતા.

આ કેસમાં સીબીઆઈએ પટનામાં રાબડી દેવીના ઘરે જઈને તેમની પૂછપરછ કરી હતી. જે બાદ લાલુ પ્રસાદ યાદવની દિલ્હીમાં પણ પૂછપરછ કરવામાં આવી હતી. આ કેસમાં લાલુ અને રાબડી દેવી ઉપરાંત તેમની પુત્રી અને આરજેડી સાંસદ મીસા ભારતી અને તેજસ્વી યાદવ સહિત કુલ 16 લોકોને આરોપી બનાવવામાં આવ્યા છે. આ કેસમાં સીબીઆઈએ અનેક સ્થળોએ દરોડા પાડ્યા હતા.

સીબીઆઈ આ કેસમાં તમામ આરોપીઓની પૂછપરછ કરવાનો પ્રયાસ કરી રહી છે જેથી તે જાણવા મળે કે તેઓ કૌભાંડ વિશે કેટલું જાણે છે. વાસ્તવમાં આરોપ છે કે લાલુ યાદવ જ્યારે રેલ મંત્રી હતા ત્યારે જમીનના બદલામાં ઘણા લોકોને નોકરી આપવામાં આવી હતી. આ જમીનો લાલુ યાદવના પરિવારના સભ્યોના નામે નોંધાયેલી હતી. હવે સીબીઆઈ દરેકને પૂછપરછ કરી રહી છે કે જ્યારે જમીનો તેમના નામે નોંધવામાં આવી હતી, ત્યારે તેમને તેની કેટલી જાણકારી હતી.