વડાપ્રધાન નરેન્દ્ર મોદી ત્રણ દિવસીય અમેરિકાના પ્રવાસે છે. આ દરમિયાન તેમને ન્યૂયોર્કમાં નાસાઉ કોલિઝિયમ ખાતે ભારતીય સમુદાયના લોકોને સંબોધિત કર્યા હતા. ત્યારે પીએમ મોદીએ યુએસએ ક્રિકેટ ટીમની ભરપૂર પ્રશંસા કરી હતી અને કહ્યું કે, યુએસ ટીમે T20 વર્લ્ડ કપમાં સારું પ્રદર્શન કર્યું. જેમાં ભારતીય મૂળના ખેલાડીઓની પણ પ્રશંસા કરી હતી.

તાજેતરમાં સમાપ્ત થયેલ T20 વર્લ્ડ કપ 2024ની યજમાની અમેરિકા અને વેસ્ટ ઈન્ડિઝ દ્વારા કરવામાં આવી હતી. આ મેચો નાસાઉ, ન્યુયોર્કમાં રમાઈ હતી. ફાઇનલમાં દક્ષિણ આફ્રિકાને હરાવી ભારત બીજી વખત ચેમ્પિયન બન્યું હતું. યુએસ ટીમે ટુર્નામેન્ટ માટે ક્વોલિફાય કર્યું હતું.

અમેરિકન ટીમે આ ટુર્નામેન્ટમાં પ્રથમ વખત ભાગ લીધો હતો અને પોતાના પ્રદર્શનથી બધાને પ્રભાવિત કર્યા હતા. મોનાંક પટેલની આગેવાની હેઠળની ટીમે સુપર-8 સુધીનો પ્રવાસ ખેડ્યો હતો. આ ટીમમાં મોનાંક પટેલ (કેપ્ટન), હરમીત સિંહ, જેસી સિંહ, મિલિંદ કુમાર, નિસર્ગ પટેલ, નીતિશ કુમાર અને સૌરભ નેત્રાવલકરનો સમાવેશ થાય છે.