કર્ણાટક વિધાનસભા ચૂંટણી માટે ભારતીય જનતા પાર્ટીની તૈયારીઓ શરૂ થઈ ગઈ છે. ભાજપના દિગ્ગજ નેતાઓ એક પછી એક ચૂંટણી રાજ્યોની મુલાકાત લઈ રહ્યા છે. કેન્દ્રીય ગૃહમંત્રી અમિત શાહ બાદ હવે વડાપ્રધાન નરેન્દ્ર મોદી આજે કર્ણાટકની મુલાકાતે જવાના છે. પીએમ મોદી તેમના કર્ણાટક પ્રવાસ દરમિયાન ઘણા કાર્યક્રમોમાં ભાગ લેશે. પીએમ મોદી આજે ભાજપની વિજય સંકલ્પ યાત્રાના સમાપન પ્રસંગે કર્ણાટક પહોંચ્યા છે. પીએમ મોદી વિજય સંકલ્પ યાત્રાને લઈને ભાજપ દ્વારા આયોજિત મેગા રેલીને સંબોધિત કરશે.

વડાપ્રધાન મોદી આજે ચિક્કાબલ્લાપુર ખાતે શ્રી મધુસુદન સાઈ ઈન્સ્ટિટ્યૂટ ઓફ મેડિકલ સાયન્સ એન્ડ રિસર્ચનું ઉદ્ઘાટન કરશે. બાદમાં પીએમ મોદી બેંગલુરુ મેટ્રોની કૃષ્ણરાજપુરા મેટ્રો લાઇન માટે વ્હાઇટફિલ્ડ કડુગોડીનું ઉદ્ઘાટન કરશે. આ સાથે તેઓ ટ્રેનમાં પણ સવાર થશે.

PM મોદી જિલ્લા મુખ્યાલય દાવંગેરે જશે અને ભાજપની વિજય સંકલ્પ યાત્રાની થીમ પર આયોજિત જનસભાને સંબોધિત કરશે. રેલીમાં કુલ 10 લાખ લોકો આવવાની આશા છે. દાવંગેરેના બીજેપી સાંસદ જીએમ સિદ્ધેશ્વરે કહ્યું કે એકલા દાવંગેરે જિલ્લામાંથી લગભગ ત્રણ લાખ લોકો રેલીમાં ભાગ લેશે.