ભારતીય શેરબજારમાં આજે મંગળવારે ઘટાડા સાથે કારોબાર શરૂ થયો હતો, જેમાં સેન્સેક્સ અને નિફ્ટી બંને ગગડ્યા હતા. બોમ્બે સ્ટોક્સ એક્સચેન્જનો સેન્સેક્સ 165 પોઈન્ટના ઘટાડા સાથે 77,103 પર ખુલ્યો હતો, જ્યારે નેશનલ સ્ટોક્સ એક્સચેન્જનો નિફ્ટી-50 ઇન્ડેક્સ 66 પોઈન્ટ ઘટીને 24,052 પર ખૂલ્યો હતો. બજારની નબળાઈની સાથે ભારતીય રૂપિયો પણ રેકોર્ડ નીચલા સ્તરે પહોંચી ગયો હતો. ડોલર સામે રૂપિયો 0.23% ઘટીને 95.31 પર ખુલ્યો હતો, જે ચિંતાનો વિષય બન્યો છે.

બજારમાં ચોતરફ વેચવાલી જોવા મળી હતી, જેમાં સેન્સેક્સની 30 મુખ્ય કંપનીઓમાંથી માત્ર 7 કંપનીઓના શેર જ ગ્રીન સિગ્નલમાં ખૂલ્યા હતા, જ્યારે અન્ય 23 કંપનીઓના શેર ઘટાડા સાથે રેડ સિગ્નલમાં ટ્રેડ થઈ રહ્યા હતા. આવી જ સ્થિતિ નિફ્ટી-50 માં પણ જોવા મળી હતી, જ્યાં 50 કંપનીઓમાંથી માત્ર 5 કંપનીઓના શેર વધારા સાથે ખૂલ્યા હતા અને બાકીની 45 કંપનીઓના શેર લાલ નિશાનમાં હતા. રોકાણકારોની સાવચેતી વચ્ચે બજારમાં મંગળવારની સવાર નબળી રહી હતી.