સપ્તાહના પ્રથમ દિવસે ભારતીય શેરબજારમાં તોફાની તેજી જોવા મળી હતી. બોમ્બે સ્ટોક એક્સચેન્જનો સેન્સેક્સ 700થી વધુ પોઈન્ટના ઉછાળા સાથે ખૂલીને 78,800ની મજબૂત સપાટી વટાવી ગયો હતો, જ્યારે નેશનલ સ્ટોક એક્સચેન્જનો નિફ્ટી પણ પાછલા બંધ સામે 180થી વધુ પોઈન્ટની મજબૂતી સાથે 24,500ના સ્તરને પાર કરી ગયો હતો. બજારમાં આવેલી આ મજબૂત તેજી પાછળ અમેરિકાના પ્રમુખ ડોનાલ્ડ ટ્રમ્પ દ્વારા ઈરાનને લઈને લેવામાં આવેલો મોટો નિર્ણય જવાબદાર માનવામાં આવી રહ્યો છે.

કારોબારની શરૂઆતમાં સેન્સેક્સ તેના પાછલા શુક્રવારના 78,094ના બંધની સરખામણીએ 789 પોઈન્ટના ઉછાળા સાથે 78,883 પર ખૂલ્યો હતો અને ત્યારબાદ વધીને 78,895ના સ્તરે પહોંચ્યો હતો. બીજી તરફ નિફ્ટી ઈન્ડેક્સ તેના પાછલા બંધ 24,383ની સામે 24,572ના સ્તરે ટ્રેડિંગ શરૂ કરતો જોવા મળ્યો હતો.

બજારની આ તેજીમાં લાર્જકેપથી લઈને સ્મોલકેપ સુધીના શેરોમાં લીલા નિશાન જોવા મળ્યા હતા. લાર્જકેપમાં બજાજ ફાઇનાન્સ 3 ટકા, ઇન્ડિગો 2.90 ટકા, બજાજ ફિનસર્વ 2.70 ટકા અને આઇટીસી 2 ટકાના વધારા સાથે કારોબાર કરી રહ્યા હતા. મિડકેપમાં અશોક લેલેન્ડ 2.95 ટકા, પેટીએમ 1.95 ટકા અને સુઝલોન 1.90 ટકા વધીને ટ્રેડ થઈ રહ્યા હતા, જ્યારે સ્મોલકેપમાં રેડિંગ્ટન 4.90 ટકા, જીઇ શિપિંગ 4.20 ટકા અને રિલાયન્સ પાવર 3.90 ટકાના ઉછાળા સાથે કામકાજ કરી રહ્યા હતા.

શેરબજારમાં જોવા મળેલી આ તેજી પાછળ ટ્રમ્પ કનેક્શન હોવાનું ચર્ચાઈ રહ્યું છે. અમેરિકન પ્રમુખ ડોનાલ્ડ ટ્રમ્પે ઈરાન સાથે ચાલી રહેલા યુદ્ધને વિરામ આપવાના સંકેત આપ્યા હતા. તેમણે સ્પષ્ટ કર્યું હતું કે સોમવાર બપોરથી તેહરાન સાથે મંત્રણાનો દોર શરૂ થઈ રહ્યો છે, જોકે આ કરાર પૂર્ણ કરવા માટે કોઈ ચોક્કસ સમયમર્યાદા નક્કી કરી નથી. હાલ ઈરાનનો પરમાણુ કાર્યક્રમ, હોર્મુઝ સ્ટ્રેટ અને પ્રાદેશિક સુરક્ષા જેવા સંવેદનશીલ મુદ્દાઓ ઉકેલાયા નથી, તેમ છતાં વધુ જાનમાલનું નુકસાન અટકાવવા માટે તેમણે રાજદ્વારી વાટાઘાટો અને કૂટનીતિને ઉત્તમ વિકલ્પ ગણાવ્યો હતો.