મહારાષ્ટ્ર ATSએ પૂણેમાંથી એક શંકાસ્પદ આતંકીની ધરપકડ કરી છે. ધરપકડ કરાયેલા આરોપીની ઓળખ જુબેર હંગરકર તરીકે થઈ છે. તેની ધરપકડ UAPA હેઠળ કરવામાં આવી છે. મળતી માહિતી મુજબ કેટલાક દિવસ પહેલા જ ATSએ પૂણેના કોંડવા વિસ્તારમાં દરોડા પાડ્યા હતા, આ કાર્યવાહી દરમિયાન મળેલા નવા પુરાવાના આધાર પર જુબેરને કસ્ટડીમાં લેવામાં આવ્યો છે.

સુત્રો દ્વારા મળતી માહિતી મુજબ શંકાસ્પદ આતંકીનું કનેક્શન અલ-કાયદા સાથે હોવાની શક્યતાઓ પણ રહેલી છે. ATSની ટીમ તેની સતત પુછપરછ કરી રહી છે અને તેના નેટવર્કની તપાસ પણ કરી રહી છે. મહારાષ્ટ્રની ATS ટીમે 9 ઓક્ટોબર 2025એ પૂણેમાં એક આતંકવાદ સાથે જોડાયેલા કેસમાં ઘણા ઠેકાણાઓ પર રેડ કરી હતી. 

આ કાર્યવાહી દરમિયાન ઘણા ઈલેક્ટ્રોનિક ઉપકરણ, દસ્તાવેજ અને શંકાસ્પદ વસ્તુઓ જપ્ત કરવામાં આવી છે. તપાસ દરમિયાન મળેલા આપતિજનક પુરાવાના આધાર પર ગેરકાયદેસર ગતિવિધિ અધિનિયમ 1967ની કલમો હેઠળ FIR દાખલ કરવામાં આવી. FIR દાખલ થયા બાદ ATSએ આજે પૂણેથી એક વ્યક્તિની ધરપકડ કરી લીધી છે. હાલમાં આ કેસની આગળની તપાસ મહારાષ્ટ્ર ATSની ટીમ કરી રહી છે.