ક્રિકેટના નિયમો બનાવનારી સંસ્થા મેરીલેબોન ક્રિકેટ ક્લબ (MCC)એ રમતની ‘લોઝ ઑફ ક્રિકેટ’ના નવા નિયમો જાહેર કર્યા છે. નવા નિયમો ઑક્ટોબર 2026થી વિશ્વભરમાં અમલમાં આવશે. રમતને વધુ રસપ્રદ બનાવવા અને વિવાદાસ્પદ નિર્ણયો ઘટાડવા માટે નવા નિયમો લાવવામાં આવ્યા છે. નવા નિયમો મુજબ, હવે રન-આઉટ કે સ્ટમ્પિંગ વખતે બોલનો માત્ર સ્પર્શ પૂરતો નહીં ગણાય. હવેથી જ્યારે બેલ્સ (ગિલ્લીઓ) ઉડે, ત્યારે ફિલ્ડર અથવા કીપરના હાથમાં બોલ હોવો જોઈએ. જો બોલ માત્ર હાથ કે ગ્લવ્ઝને અડીને વિકેટ પર વાગશે તો બેટર આઉટ ગણાશે નહીં. ટેસ્ટ અથવા મલ્ટી-ડે મેચમાં હવે જો દિવસની છેલ્લી ઓવર દરમિયાન વિકેટ પડશે, તો પણ રમત પૂરી નહીં થાય. નવા બેટરે મેદાનમાં આવીને તે ઓવરના બાકીના બોલ રમવા પડશે. અત્યાર સુધી વિકેટ પડ્યા બાદ દિવસની રમત ત્યાં જ સમાપ્ત કરી દેવામાં આવતી હતી.
બાઉન્ડ્રી પર કેચ પકડતી વખતે 'બન્ની હોપ' (હવામાં ઉછળીને ફરી અંદર આવવું) પર પ્રતિબંધ લાદવામાં આવ્યો છે. હવામાં બોલ પકડ્યા બાદ જમીન પરનો સંપર્ક બાઉન્ડ્રીની અંદર જ હોવો જોઈએ. તમે અનેક મેચોમાં જોયું હશે કે, જ્યારે બેટરના શોર્ટથી બોલ હવામાં બાઉન્ડ્રીની નજીક પહોંચે છે, ત્યારે ફિલ્ડરના હાથમાં બોલ આવ્યા બાદ તે બાઉન્ડ્રીની બહાર જતી વખતે બોલ હવામાં ઉછાળી દે છે અને પછી ફરી તે બાઉન્ડ્રી અંદર આવીને તે ઉછાળેલો બોલ પકડી લે છે, જેના કારણે બેટર આઉટ થઈ જાય છે, જોકે હવે આ નિયમ બંધ કરી દેવાયો છે.