લાંબા સમયથી અમેરિકા ઈઝરાયલ અને ઈરાન વચ્ચે ટેન્શનની સ્થિતિ દેખાતી હતી. યુદ્ધના ભણકારા વાગી રહ્યા હતા ત્યારે ઈઝરાયલના સંરક્ષણ મંત્રીએ આપેલી માહિતી અનુસાર ઈરાનની રાજધાની તહેરાન સહિત અનેક વિસ્તારોમાં ઈઝરાયલી સેના દ્વારા મોટો હુમલો કરી દેવામાં આવ્યો છે. 

ઈરાને પણ હવે ઈઝરાયલ પર વળતો હુમલો કરવાની શરૂઆત કરી દીધી છે. ઈરાન તરફથી મિસાઈલો ઝીંકવામાં આવી રહી છે. ઈરાને એકસાથે 70થી વધુ મિસાઈલો ઝીંકીને ઈઝરાયલમાં અફરાતફરીનો માહોલ સર્જ્યો છે. ઈરાનના હુમલાને પગલે ઈઝરાયલમાં સતત સાયરન વાગી રહ્યા છે. ઈઝરાયલી સેનાએ પણ ઈરાનના હુમલાની પુષ્ટી કરી દીધી છે. આ સાથે ઈઝરાયલે તેની ડિફેન્સ સિસ્ટમ આયરન ડોમને એક્ટિવ કરી દીધી છે. 

અત્યારે સુત્રો દ્વારા મળતી માહિતી અનુસાર આયતુલ્લાહ ખામેનેઈ જે ઈરાનના સુપ્રીમ લીડર છે તેમણે અમેરિકા અને ઈઝરાયલ પર વળતો પ્રહાર કરવા અને મિસાઈલોનો મારો ચલાવીનો આદેશ આપી દીધો છે. 

ઈઝરાયલ જતી એર ઈન્ડિયાની ફ્લાઈટ પરત 

દિલ્હીથી તેલ અવીવ જતી એર ઈન્ડિયાની ફ્લાઈટ પાછી આવી ગઇ છે. કારણ કે ઈઝરાયલ અને અમેરિકાએ ઈરાન પર હુમલા કર દેતા ઈઝરાયલ અને ઈરાનના એરસ્પેસ બંધ કરી દેવામાં આવ્યા છે.  

ઈઝરાયલ અને અમેરિકાના હુમલાને પગલે ઈરાનમાં તાત્કાલિક ધોરણે ઈન્ટરનેટ બંધ કરી દેવામાં આવ્યું છે. આ સાથે અહેવાલ મળી રહ્યા છે કે ઈઝરાયલ અને અમેરિકાએ ઈરાનના વધુ એક શહેર બંદર અબ્બાસ પર મોટો હુમલો કર્યો છે. 

સૂત્રોના જણાવ્યાનુસાર IRGC એ પણ અમેરિકા અને ઈઝરાયલ પર વળતો હુમલો કરવાની તૈયારી કરી લીધી છે. હવે ગમે તે ઘડીએ મધ્યપૂર્વમાં ભીષણ યુદ્ધ સર્જાઈ શકે છે. મધ્યપૂર્વમાં અમેરિકાના વિવિધ સૈન્ય ઠેકાણાઓ તથા ઈઝરાયલ ઈરાન દ્વારા પ્રચંડ હુમલા કરવામાં આવી શકે છે.