વાયદા બજારમાં આજે સોના-ચાંદીના ભાવમાં મોટો ઘટાડો નોંધાયો હતો. આંતરરાષ્ટ્રીય બજારની નરમાઈ અને વૈશ્વિક આર્થિક પરિબળોની અસરથી MCX ખુલતાની સાથે જ કિંમતી ધાતુઓમાં ભારે વેચવાલી જોવા મળી હતી. ડિસેમ્બર વાયદાનું સોનું અગાઉના 153277ના બંધ ભાવ સામે 150399 પર ખુલ્યું હતું અને 150224ના નીચલા સ્તરે પહોંચ્યું હતું. સમાચાર લખાયાં ત્યારે સોનું 150517 પર ટ્રેડ થઈ રહ્યું હતું, જે 1.80 ટકા એટલે કે 2760 રૂપિયાનો ઘટાડો દર્શાવે છે. દિવસ દરમિયાન સોનું 3053 રૂપિયાથી વધુ તૂટ્યું હતું, જોકે બાદમાં સામાન્ય સુધારો થયો હતો.

ચાંદીમાં પણ ભારે ધોવાણ થયું હતું. ડિસેમ્બર વાયદાની ચાંદી 234696ના અગાઉના બંધ ભાવ સામે 232300 પર ખુલી હતી અને કારોબાર દરમિયાન 228035 સુધી ગગડી હતી. હાલમાં ચાંદી 228783 પર ટ્રેડ થઈ રહી હતી, જે 2.52 ટકા એટલે કે 5913 રૂપિયાનો ઘટાડો દર્શાવે છે. દિવસ દરમિયાન ચાંદી કુલ 6661 રૂપિયા સુધી તૂટી હતી, બાદમાં તેમાં પણ આંશિક સુધારો થયો હતો.

સોના-ચાંદીમાં ઘટાડા પાછળ યુએસ ડૉલર ઇન્ડેક્સ અને ટ્રેઝરી બોન્ડ યીલ્ડમાં મજબૂતી મુખ્ય કારણ બની છે. આગામી અમેરિકી આર્થિક ડેટા અને ફેડરલ રિઝર્વના વલણ પહેલાં રોકાણકારો સાવચેતી રાખી રહ્યા છે અને પ્રોફિટ બુકિંગ કરી રહ્યા છે. કરન્સીની અસ્થિરતા તથા કોમોડિટી બજારમાં ઊંચી વધઘટને કારણે પણ કિંમતી ધાતુઓ પર દબાણ વધ્યું છે.