દુનિયાના સૌથી મહાન સેનાપતિઓમાં સ્થાન પામતા નેપોલિયન બોનાપાર્ટની એક હેટની રવિવારે હરાજી થઈ હતી અને તેના માટે લાગેલી બોલી આંખો પહોળી કરી નાંખે તેવી છે. મળતી વિગતો પ્રમાણે આ હેટ બે મિલિયન યુરો એટલે કે 17 કરોડ રૂપિયા કરતા વધારે રકમમાં વેચાઈ છે. આ પહેલા 2014માં નેપોલિયન બોનાપાર્ટની હેટ માટે 1. 8 મિલિયન યુરોની બોલી લાગી હતી. આ રેકોર્ડ તુટી ગયો છે. રેકોર્ડબ્રેક કિંમતે વેચાયેલી હેટ પર નેપોલિયન બોનાપાર્ટની સહી અને ફ્રાંસના ધ્વજના રંગ છે. ઓક્શન હાઉસે જોકે આ હેટ ખરીદનારનુ નામ જાહેર કર્યા વગર કહ્યુ છે કે, હેટ માટેની હરાજી માટે દુનિયાભરના સંગ્રાહકોએ બોલી લગાવી હતી. આ હેટ પહેલા વ્યવસાયી જીન લુઈ નોઈસિએજ પાસે હતી. જેમનુ ગત વર્ષે નિધન થયુ હતુ. હેટ માટે લાગેલી બોલી અમારા અનુમાન કરતા ચાર ગણી વધારે હતી. આ હેટ નેપોલિયન બોનાપાર્ટની ઈમેજનુ પ્રતિનિધિત્વ કરતી હતી. આ હેટના કારણે નેપોલિયન જ્યાં પણ જાય ત્યાં ઓળખી જતા હતા. યુધ્ધના મેદાનમાં પણ તે આ હેટ પહેરતા હતા. નિષ્ણાત જીન પિયરે ઓસેનટના કહેવા અનુસાર નેપોલિયન મોટાભાગે તેને માથા પર અથવા પોતાના હાથ પર રાખતા હતા. આ સમ્રાટની ઈમેજ સાથે અતુટ રીતે જોડાઈ ગયેલી હેટ હતી.