ક્રિકેટના ઈતિહાસમાં એક નવો વર્લ્ડ રેકોર્ડ સર્જાયો હતો. બેટિંગમાં વારંવાર વર્લ્ડ રેકોર્ડ જોવા મળે છે, પરંતુ આ વખતે બોલિંગમાં ઐતિહાસિક સિદ્ધિ મેળવી હતી. આ રેકોર્ડ સ્કોટિશ બોલર ચાર્લી કેસલે બનાવ્યો હતો. ચાર્લીએ સાઉથ આફ્રિકાના સ્ટાર ફાસ્ટ બોલર કાગિસો રબાડાને પાછળ છોડીને આ રેકોર્ડ હાંસલ કર્યો હતો. સ્કોટલેન્ડના ચાર્લીએ વર્લ્ડ કપ લીગ 2ની ઓમાન સામેની મેચમાં આ વર્લ્ડ રેકોર્ડ બનાવ્યો હતો.

ચાર્લી કેસલે તેની કારકિર્દીની પ્રથમ ODI મેચમાં સૌથી વધુ વિકેટ લઈને શ્રેષ્ઠ સ્પેલ બોલિંગ કરવાનો રેકોર્ડ બનાવ્યો હતો. તેણે કાગિસો રબાડાને પાછળ છોડી દીધો. ચાર્લીએ ઓમાન સામે રમાયેલી પોતાની ડેબ્યૂ મેચમાં માત્ર 21 રન આપીને 7 વિકેટ લીધી હતી. આ પહેલા આ રેકોર્ડ દક્ષિણ આફ્રિકાના કાગિસો રબાડાના નામે હતો. રબાડાએ બાંગ્લાદેશ સામે વનડેમાં ડેબ્યુ કર્યું હતું. પોતાની ડેબ્યુ મેચમાં તેણે માત્ર 16 રન આપીને 6 વિકેટ ઝડપી હતી.