આખી દુનિયામાં જેના નામનો ડંકો વાગે છે તેવું અધધ રકમ અને પ્રસિદ્ધિ અપાવનારા નોબેલ પુરસ્કારની જાહેરાત કરવાનો પ્રારંભ થઈ ચુકયો છે. સૌ પ્રથમ મેડિસિન ક્ષેત્રના નોબેલ પુરસ્કારની જાહેરાત કરાવમાં આવી છે. ત્યારબાદ સાહિત્ય, ભૌતિક અને બીજા નોબેલ પુરસ્કારની જાહેરાત થશે. આ વખતે તબીબી ક્ષેત્રનું નોબેલ અમેરિકાના બે વૈજ્ઞાનિકોને મળ્યું છે. નોબેલ પુરસ્કાર વિજેતાઓને 11 મિલિયન સ્વિડિશ ક્રોનર પુરસ્કારની રકમ તરીકે અપાય છે.

અમેરિકી વૈજ્ઞાનિક વિક્ટર એમ્બ્રોસ અને ગેરી રુવકુનને માઈક્રો આરએનએ પર તેઓના કામ માટે તબીબી ક્ષેત્રનું નોબેલ પુરસ્કાર આપવાની જાહેરાત કરવામાં આવી છે. માઈક્રો આરએનએ પર કરાયેલા સંશોધનને એ સમજવામાં મદદ કરે છે કે આપણું જીન માનવ શરીરની અંદર કઈ રીતે કામ કરે છે અને આ માનવ શરીરની જુદીજુદી પેશીઓ કરી રીતે જન્મે છે.

મેડિસિન ક્ષેત્ર માટે નોબેલ પુરસ્કાર વિજેતાઓની પસંદગી સ્વીડનની કારોલિંસ્કા ઈન્સિટ્યૂટની નોબેલ એસેમ્બલી તરફથી કરવામાં આવે છે. વૈજ્ઞાનિકોનું કહેવું છે કે, તેઓની શોધથી જીન્સના કંટ્રોલ અંગેનો એક નવો સિદ્ધાંત સામે આવ્યો છે. જે મનુષ્યો સહિત બહુકોશિકીય જીવો માટે ખૂબ જરૂરી સાબિત થયું છે. સંશોધનથી જાણવા મળ્યું છે કે, માનવ જિનોમ એક હજારથી વધુ માઈક્રો આરએનએને કોડ કરે છે.