સોના-ચાંદીના ભાવ રોજ નવી ઐતિહાસિક ટોચ નોંધાવી રહ્યા છે. વૈશ્વિક બજારોના સથવારે આજે સ્થાનિક બજારમાં સોનાનો ભાવ રૂ. 1500 ઉછળી ફરી નવી રૂ. 1,24,000 પ્રતિ 10 ગ્રામની ઓલ ટાઈમ હાઈ સપાટીએ પહોંચ્યો છે. ચાંદી પણ રૂ. 2000 ઉછળી રૂ. 1,52,000 પ્રતિ કિગ્રાની રેકોર્ડ ટોચે પહોંચી છે.

એમસીએક્સ ખાતે સાંજના સેશન દરમિયાન સોનાનો 5 ડિસેમ્બર વાયદો 1741 રૂપિયા ઉછળી 119854 પ્રતિ 10 ગ્રામની સપાટીએ ટ્રેડ થઈ રહ્યો હતો. જ્યારે ચાંદી વાયદો રૂ. 1452 ઉછળી રૂ. 147196 પર ક્વોટ થયો હતો. 

અમેરિકામાં ફેડ રિઝર્વ દ્વારા વ્યાજના દર ઘટાડવાની પ્રબળ શક્યતાઓ વચ્ચે  કિંમતી ધાતુમાં રોકાણ વધ્યું છે. વૈશ્વિક બજારોમાં સોનું 3900 ડોલર પ્રતિ ઔંસનું રેકોર્ડ લેવલ ક્રોસ કરી ગયુ છે. ફેડ ગવર્નર સ્ટીફન મિરાને હાલમાં જ વ્યાજના દરોમાં ઘટાડો કરવા મુદ્દે જાણકારી આપી હતી. વ્યાજના દરોમાં ઘટાડો તેમજ ટેરિફના કારણે સર્જાયેલી અનિશ્ચિતતાના પગલે સોના-ચાંદીમાં પૂરબહાર તેજી જોવા મળી છે.

અમેરિકાની અર્થવ્યવસ્થા પર અનિશ્ચિતતા અને જીડીપી ગ્રોથમાં ઘટાડાની ભીતિ સર્જાઈ છે. અમેરિકામાં બેરોજગારીનો દર પણ વધી રહ્યો છે. બીજી તરફ રશિયા-યુક્રેન વચ્ચે ચાલી રહેલું યુદ્ધ વૈશ્વિક સ્તરે જિઓ-પોલિટિકલ ક્રાઈસિસ સર્જી રહ્યું છે. જેના પગલે રોકાણકારો સેફ હેવન તરફ ડાયવર્ટ થયા છે. ડોનાલ્ડ ટ્રમ્પની ટેરિફ નીતિના કારણે વિવિધ દેશોની સેન્ટ્રલ બેન્કોએ ગોલ્ડ રિઝર્વમાં વધારો કર્યો છે. વધુમાં ઈકો-ફ્રેન્ડલી વ્હિકલ્સને પ્રાધાન્ય આપતાં ઈ-વ્હિકલ્સની માગ વધી છે. ઈલેક્ટ્રોનિક ગેજેટ્સમાં પણ વેચાણ વધતાં ચાંદી ઓન ડિમાન્ડ છે. ડોલર સામે રૂપિયો પણ તળિયે ઝાટક થયો છે. આજે તે ડોલર સામે 88.79ની સપાટીએ બંધ રહ્યો હતો.જો કે, તેનું રેકોર્ડ તળિયું 88.80 છે.  ચાલુ કેલેન્ડર વર્ષમાં ડોલર સામે રૂપિયો 3.71 ટકા તૂટ્યો છે.