ચેન્નાઈ: IPL-2023માં આજના પ્રથમ ક્વોલિફાયર-1 રાઉન્ડમાં ચેન્નાઈ સુપર કિંગ્સે ગુજરાત ટાઈટન્સને 15 રને હરાવ્યું છે. ચેન્નાઈના 20 ઓવરમાં 7 વિકેટે 172 રનના જવાબમાં ગુજરાતની ટીમ 157 રને ઓલઆઉટ થઈ જતા ચેન્નાઈનો વિજય થયો છે અને 10મી વખત ફાઈનલમાં પહોંચી છે. ચેન્નાઈ તરફથી ઋતુરાજ ગાયકવાડ અને ડેવોન કોનવેએ તોફાની બેટીંગ કરતા તેમજ ટીમે ઓલરાઉન્ડર પ્રદર્શન કરતા ચેન્નાઈનો વિજય થયો છે. ધોનીની કપ્તાની હેઠળ ટીમ હવે 28મી મેના રોજ અમદાવાદના નરેન્દ્ર મોદી સ્ટેડિયમમાં પાંચમી વખત ચેમ્પિયન બનવા માટે ઉતરશે. બીજી તરફ આ હાર બાદ ગુજરાત બહાર થઈ નથી. તેને ફાઇનલમાં પહોંચવાની બીજી તક મળશે. ગુજરાતની ટીમ અમદાવાદમાં 26મી મેના રોજ ક્વોલિફાયર-2માં રમશે. અહીં તે મુંબઈ ઈન્ડિયન્સ અથવા લખનઉ સુપર જાયન્ટ્સ સામે મેચ રમશે. બુધવારે (24મી મે)ના રોજ મુંબઈ અને લખનઉ વચ્ચે એલિમિનેટર મેચ રમાશે. આ મેચમાં વિજેતા ટીમ ક્વોલિફાયર-2માં જશે.