બીસીસીઆઈ યુવા ક્રિકેટરોને ડ્રગ્સ, સટ્ટાબાજી અને મેચ ફિક્સિંગના જોખમોથી જાગૃત કરવા નવી પહેલ શરૂ કરવાની તૈયારીમાં છે. આ કાર્યક્રમની જવાબદારી નવી જુનિયર ક્રિકેટ પસંદગી સમિતિને સોંપવામાં આવશે. બોર્ડની આગામી વાર્ષિક સામાન્ય સભામાં સમિતિની નિમણૂક થવાની શક્યતા છે. બીસીસીઆઈએ જુનિયર પસંદગી પેનલના 5 પદ માટે અરજીઓ મંગાવી છે અને તેની અંતિમ તારીખ 5 સપ્ટેમ્બર નક્કી કરી છે.

નવી સમિતિ પ્રતિભાશાળી ખેલાડીઓની ઓળખ અને પસંદગી સાથે યુવાનોમાં મજબૂત નૈતિક મૂલ્યો વિકસાવવામાં પણ ભૂમિકા ભજવશે. ખેલાડીઓને ડ્રગ્સ, સટ્ટાબાજી અને મેચ ફિક્સિંગના જોખમો સમજાવવા વર્તમાન તથા ભૂતપૂર્વ આંતરરાષ્ટ્રીય ક્રિકેટરો સાથે વાતચીત કરાવવામાં આવશે. બીસીસીઆઈના એક અધિકારીએ કહ્યું કે આવી જાગૃતિ વહેલી ઉંમરે જરૂરી છે, કારણ કે ખાસ કરીને અંડર-19 સ્તરે પૈસા અને ખ્યાતિનું મહત્વ વધતાં યુવા ખેલાડીઓ નકારાત્મક પ્રભાવનો ભોગ બની શકે છે.

નવી પેનલ સાઉથ ઝોનના એસ શરથ, નોર્થ ઝોનના ચેરમેન કૃષ્ણ મોહન, ઈસ્ટ ઝોનના રણદેવ બોઝ, વેસ્ટ ઝોનના પથિક પટેલ અને સેન્ટ્રલ ઝોનના હરવિંદર સિંહ સોઢીની હાલની સમિતિનું સ્થાન લેશે. આ સમિતિની નિમણૂક સપ્ટેમ્બર 2021માં થઈ હતી અને તેનો 5 વર્ષનો કાર્યકાળ પૂર્ણ થવા નજીક છે. હાલની પેનલની છેલ્લી જવાબદારી સીકે નાયડુ ટ્રોફી ચેમ્પિયન સામે જુનિયર ઈરાની કપ માટે રેસ્ટ ઓફ ઈન્ડિયા અંડર-23 ટીમની પસંદગી કરવાની રહેશે.

નવી સમિતિ ડોમેસ્ટિક અને આંતરરાષ્ટ્રીય મેચો માટે અંડર-22 સુધીની વયજૂથની ટીમો તથા કોચિંગ કેમ્પ માટે ખેલાડીઓની પસંદગી કરશે અને મેચો દરમિયાન તેમના પ્રદર્શનનું મૂલ્યાંકન કરશે. તે ભારતીય ક્રિકેટ માટે યુવા પ્રતિભાઓનો મજબૂત પૂલ વિકસાવવામાં પણ ભૂમિકા ભજવશે. પસંદગીકાર બનવા ઇચ્છતા ભૂતપૂર્વ ક્રિકેટરે ઓછામાં ઓછી 25 ફર્સ્ટ ક્લાસ મેચ રમી હોવી અને રમતમાંથી ઓછામાં ઓછા 5 વર્ષ પહેલાં નિવૃત્તિ લીધી હોવી જરૂરી છે.