ઈરાને 2000 KM રેન્જ ધરાવતી બેલેસ્ટિક મિસાઈલનું સફળ પરીક્ષણ કર્યું છે. ઈરાનનો દાવો છે કે આ મિસાઈલ મધ્ય પૂર્વમાં અમેરિકા અને ઈઝરાઇલના અડ્ડા સુધી પહોંચવામાં સક્ષમ છે. અમેરિકા અને યુરોપના વારંવારના વિરોધ છતાં ઈરાને કહ્યું છે કે તે તેના મિસાઈલ કાર્યક્રમને વિકસાવવાનું ચાલુ રાખશે.

ઈરાનના રક્ષા મંત્રી મોહમ્મદરેઝા અશ્તિયાનીએ કહ્યું- આ આપણા દુશ્મનોને સંદેશ છે કે અમે દરેક કિંમતે અમારી સુરક્ષા કરીશું. તે જ સમયે, અમે અમારા મિત્રોને કહેવા માંગીએ છીએ કે અમે પ્રદેશમાં શાંતિ માટે શક્ય તેટલું બધું જ કરી રહ્યા છીએ. ઈરાનની સરકારી સમાચાર એજન્સી IRNAએ જણાવ્યું કે ખૈબર નામની મિસાઈલ 1500 કિલોગ્રામ સુધીના વોરહેડ લઈ જવા માટે સક્ષમ છે.

IRNA અનુસાર, આ મિસાઇલ પર્સિયન ગલ્ફમાં પેટ્રોલિંગ કરી રહેલા યુદ્ધ જહાજો અને સબમરીન પર તૈનાત કરવામાં આવી છે. નેવીનું કહેવું છે કે ઈરાનની આર્મ્ડ ફોર્સ આઈઆરજીસી ગલ્ફમાં દુશ્મન જહાજોની ગતિવિધિઓ પર સતત નજર રાખી રહી છે. આ બેલેસ્ટિક મિસાઈલ અમેરિકાના ટોમાહોક કરતા પણ વધુ અંતર કાપવાની ક્ષમતા ધરાવે છે.

થોડા દિવસો પહેલા ન્યૂઝ એજન્સી એપીના એક રિપોર્ટમાં દાવો કરવામાં આવ્યો હતો કે ઈરાન પોતાની પરમાણુ સુવિધાને ઈઝરાઇલ અને અમેરિકાના હુમલાથી બચાવવા માટે તમામ પ્રયાસ કરી રહ્યું છે. તે હવે પર્વતીય વિસ્તારમાં ભૂગર્ભમાં પરમાણુ હથિયારો બનાવી રહ્યો છે. તેની સેટેલાઇટ તસવીરો પણ સામે આવી હતી.

જેમાં ઈરાની કામદારો ઝાગ્રોસના પહાડોમાં સુરંગ ખોદતા જોવા મળ્યા હતા. આ સ્થળ ઈરાનની ન્યુક્લિયર સાઈટ નતાન્ઝની ખૂબ જ નજીક છે, જેના પર પશ્ચિમી દેશોના સતત હુમલાઓ થઈ રહ્યા છે.