ઈઝરાયલે લેબનોનમાં તેના હુમલાઓ તેજ કર્યા છે. ઈઝરાયેલી સેના એટલે કે IDFએ દાવો કર્યો છે કે તેણે છેલ્લા 4 દિવસમાં લેબનોનમાં 2000થી વધુ સૈન્ય મથકો અને 250 હિઝબુલ્લા આતંકવાદીઓને ઠાર કર્યા છે. IDFએ દાવો કર્યો છે કે, હિઝબુલ્લાહના 5 બટાલિયન કમાન્ડર, 10 કંપની કમાન્ડર અને 6 પ્લાટૂન કમાન્ડરના મોત થયા છે. IDFએ કહ્યું છે કે, ઈઝરાયેલી વાયુસેના પણ ગુપ્ત માહિતીના આધારે દક્ષિણ લેબનોનમાં તેની કામગીરી કરી રહી છે.

લેબનીઝ આરોગ્ય મંત્રાલયના જણાવ્યા અનુસાર રાજધાની બેરૂતમાં એક એપાર્ટમેન્ટ પર ઈઝરાયેલના હવાઈ હુમલામાં નવ લોકોના મોત થયા છે. ઈઝરાયલ સપ્ટેમ્બરના અંતથી દેશના એવા વિસ્તારો પર હુમલો કરી રહ્યું છે જ્યાં હિઝબુલ્લા આતંકવાદી જૂથ મજબૂત હાજરી ધરાવે છે. તાજેતરમાં જ ઈઝરાયલે બેરૂતમાં કરેલા હવાઈ હુમલામાં હિઝબુલ્લાના ચીફ હસન નસરલ્લાહનું મોત થયું છે.

ઈઝરાયલે હિઝબુલ્લાહ વિરુદ્ધ લેબનોનમાં ગ્રાઉન્ડ ઓપરેશન પણ શરૂ કરી દીધું છે, જ્યારે તે ગાઝામાં હવાઈ હુમલા પણ કરી રહ્યું છે. ઈઝરાયલની સેનાએ કહ્યું હતું કે, દક્ષિણ લેબનોનમાં થયેલા સંઘર્ષમાં 9 સૈનિકોના મોત થયા છે. 7 ઓક્ટોબર 2023થી હમાસના ક્રોસ બોર્ડર હુમલાના બીજા દિવસે ઈઝરાયલ અને હિઝબુલ્લા લગભગ દરરોજ લેબનોન સરહદ પર ગોળીબાર કરતા જોવા મળે છે. આ હુમલામાં 1,000થી વધુ ઈઝરાયલના નાગરિકોના મોત થયા હોવાના અહેવાલ હતા, જ્યારે 250થી વધુ બંધક બનાવી લેવામાં આવ્યા હતા.