Tata Technologies નું આજે ધમાકેદાર લિસ્ટિંગ થયું છે અને શેર સતત વધતો જાય છે. 140 ટકા પ્રીમિયમ ભાવે ખુલ્યા પછી શેર 1345 પર ચાલતો હતો. એટલે કે 169 ટકા જેટલો વધી ગયો છે. સવારથી જ આ શેરમાં ભારે રસ જોવા મળ્યો છે અને આ દાયકામાં આ સૌથી સફળ આઈપીઓ ગણવામાં આવે છે.

Tata Technologies IPO Listing: ટાટા જૂથની કંપની Tata Technologiesનું આજે શેરમાર્કેટમાં ભવ્ય લિસ્ટિંગ થયું છે. 500 રૂપિયાની ઓફર પ્રાઈસ સામે આ શેર આજે બજારમાં 1200ના ભાવે ખુલ્યો છે. એટલે કે 140 ટકા પ્રીમિયમ ભાવે લિસ્ટિંગ થયું છે. રિટેલ શેરહોલ્ડરોને એક એપ્લિકેશન દીઠ સીધો 21,000 રૂપિયાનો ફાયદો થયો છે જ્યારે એચએનઆઈ અને મોટા રોકાણકારોને ઓછામાં ઓછા 2.94 લાખ રૂપિયાનો ફાયદો થયો છે. ટાટા જૂથ બે દાયકા અગાઉ ટાટા કન્સલ્ટન્સી સર્વિસિસ (ટીસીએસ)નો આઈપીઓ લાવ્યું હતુ. ત્યાર પછી ટાટા ટેક્નોલોજિસના આઈપીઓ માટે બજારમાં રસ હતો અને ખરેખર જંગી કમાણી કરાવી છે.

આ લખાય છે ત્યારે સવારે 10.05 વાગ્યે ટાટા ટેક્નોલોજિસનો શેર 1345 પર ચાલતો હતો. એટલે કે 500 રૂપિયાની ઈશ્યૂ પ્રાઈસની તુલનામાં આ શેર 169 ટકા વધી ગયો છે.

ટાટા ટેકના આઈપીઓ માટે બજારમાં એટલો બધો રસ હતો કે એક તબક્કે ગ્રે માર્કેટ 80 ટકા વધી ગયું હતું. ગ્રે માર્કેટમાં ટાટા ટેક્નોલોજિસના શેર 900 રૂપિયાના ભાવે ટ્રેડ થતા હતા. પરંતુ જે પ્રકારનું લિસ્ટિંગ થયું છે તેણે સાબિત કરી દીધું કે ગ્રે માર્કેટ કરતા પણ વધારે બુલિશ સેન્ટીમેન્ટ છે. Tata Technologiesના ગ્રોથ અને તેની ભવિષ્યની યોજનાઓ માટે એટલો બધો આશાવાદ છે કે તેના શેરની ભયંકર ડિમાન્ડ જોવા મળી રહી છે.

આ આઈપીઓને તમામ એક્સપર્ટે સબસ્ક્રાઈબ રેટિંગ આપ્યું હતું જેના કારણે આ ઈશ્યૂ 70 ગણા કરતા પણ વધુ છલકાયો હતો. છેલ્લા એક વર્ષથી ટાટા ટેક્નોલોજિસના આઈપીઓની વાતો થઈ રહી હતી અને રોકાણકારો આ ઈશ્યૂ માટે કાગડોળે વાટ જોઈ રહ્યા હતા. આખરે આ શેરનું લિસ્ટિંગ થયું ત્યારે સાબિત થઈ ગયું છે કે તેમની ઈંતજારી યોગ્ય હતી.

ટાટા ટેક્નોલોજિસનો શેર 1200 રૂપિયાના ભાવે લિસ્ટ થયા પછી થોડી જ મિનિટોમાં તે 1400 રૂપિયા સુધી પહોંચી ગયો હતો. એટલે કે 1200 રૂપિયા એ આજની નીચી સપાટી બની હતી. હજુ આજનું સત્ર પૂરું થાય ત્યાં સુધીમાં આ શેરમાં કેવી મુવમેન્ટ આવે છે તે જોવાનું રહેશે.

Tata Technologiesના આઈપીઓ માટે 475 રૂપિયાથી 500 રૂપિયા સુધીની પ્રાઈસ બેન્ડ રાખવામાં આવી હતી. રોકાણકારે ઓછામાં ઓછા 30 શેર માટે બિડ કરવાની હતી. અપર પ્રાઈસ બેન્ડ પર આ ઈશ્યૂની સાઈઝ 3042 કરોડ રૂપિયા થતી હતી. આ એક સંપૂર્ણ ઓફર ફોર સેલ હતી જેમાં 6.08 કરોડ શેર વેચવામાં આવ્યા હતા. ટાટા મોટર્સ, આલ્ફા ટીસી હોલ્ડિંગ્સ અને ટાટા કેપિટલ ગ્રોથ ફંડે પણ આ ઈશ્યૂમાં ભાગ લીધો હતો.