બેરૂત- લેબનોનમાં સીરિયલ બ્લાસ્ટ થયો હોવાની ઘટના સામે આવી છે. અહીં પેજર બ્લાસ્ટ થવાના કારણે ઈરાનના રાજદૂત સહિત 1000થી વધુ લોકો ઈજાગ્રસ્ત થયા છે. આ ઈજાગ્રસ્તોમાં હિઝબુલ્લાના સભ્યો અને આરોગ્ય કર્મચારીઓ પણ સામેલ છે. ઈરાનની મેહર સમાચાર એજન્સીના અહેવાલ મુજબ ઈરાનના રાજદૂત મોજીતબા અમાની પણ ઈજાગ્રસ્ત થયા છે.

લેબનોનથી મળતા અહેવાલો મુજબ, દક્ષિણ લેબનોન અને રાજધાની બેરૂત, દમાસ્કસ સહિત ઘણા સ્થળો પર સીરિયલ બ્લાસ્ટ થયા છે, જેમાં હિઝબુલ્લાના અનેક લોકો ગંભીર રીતે ઈજાગ્રસ્ત થયા છે. આ વિસ્ફોટમાં કેટલાક લોકોના મોત થયા, તેની હજુ કોઈ વિગતો સામે આવી નથી. એવું કહેવાય છે કે, કોમ્યુનિકેશન માટે પેજરનો ઉપયોગ કરી રહ્યા હતા અને તે તમામ પેજરમાં એક સાથે બ્લાસ્ટ કરવામાં આવ્યો. હિઝબુલ્લાહે તેના તમામ સભ્યોને તેમના પેજર તાત્કાલિક કાઢી નાખવા સૂચના આપી છે. આ ઘટનાને ગુપ્તચર તંત્રના ઈતિહાસની સૌથી ગંભીર ચૂક તરીકે જોવામાં આવી રહી છે. એવું કહેવાય છે કે, સ્થાનિક સમય મુજબ આ ઘટના 3.45 કલાકે થઈ હતી અને એક પછી એક બ્લાસ્ટ થયા હતા. અનેક સ્થળે વિસ્ફોટો થયા બાદ ભારે અફરાતફરી મચી છે.

એવા અહેવાલ સામે આવ્યા છે કે, લગભગ એક કલાક સુધી અનેક સ્થળોએ પેજર વિસ્ફોટ થયા હતા. આ ઉપકરણમાં કેવી રીતે વિસ્ફોટ કરવામાં આવ્યો, તેનું કારણ હજુ સામે આવ્યું નથી. દક્ષિણ લેબનોન સ્થિત હોસ્પિટલના વડા હસન વાઝનીએ જણાવ્યું કે, લગભગ 40 ઈજાગ્રસ્તોની સારવાર કરવામાં આવી રહી છે. આ લોકોને ચહેરા, આંખો અને અંગો પર ઇજાઓ સામેલ છે.