FPIsની ઇક્વિટીમાં ₹10,426 કરોડની ચોખ્ખી ખરીદી

February 17, 2020

નવી દિલ્હી:વિદેશી રોકાણકારોએ ફેબ્રુઆરીના પ્રથમ ભાગમાં ભારતીય મૂડીબજારમાં ચોખ્ખી ખરીદી કરી હતી. તેમણે આ સમયગાળામાં ₹24,617કરોડની ચોખ્ખી ખરીદી કરી છે. વૈશ્વિક બજારના પોઝિટિવ સંકેત અને રિઝર્વ બેન્કે નાણાનીતિમાં એકોમોડેટિવ વલણ જાળવી રાખતાં વિદેશી ફંડ્સના વિશ્વાસમાં વધારો થયો હતો.

ડિપોઝિટરીના ડેટા મુજબ 3-14 ફેબ્રુઆરી દરમિયાન વિદેશી પોર્ટફોલિયો રોકાણકારો(FPI)એ ડેટ માર્કેટમાં ₹14,191 કરોડની ચોખ્ખી ખરીદી કરી હતી. આ સમયગાળામાં તેમણે ઇક્વિટી માર્કેટમાં ₹10,426 કરોડની ચોખ્ખી ખરીદી કરી હતી. આ રીતે ડેટ અને ઇક્વિટી મળીને કુલ ₹24,617કરોડની નેટ ખરીદી તેમણે કરી હતી. એફપીઆઇએ સતત છઠ્ઠા મહિને નેટ ખરીદી આગળ ધપાવી છે. અગાઉ પાંચ મહિના દરમિયાન તેમણે નેટ ખરીદી કરી હતી.

બજારના નિષ્ણાતોએ જણાવ્યું હતું કે આરબીઆઇએ તેની મોનિટરી પોલિસી કમિટીની રિવ્યૂ મીટિંગમાં એકોમોડેટિવ વલણ જાળવી રાખ્યું છે. બીજી તરફ કોરોના વાઇરસની ચિંતા થોડી ઘટી છે. આથી એફપીઆઇએ એકંદરે તેજીનું વલણ જાળવી રાખ્યું છે. ભારતમાં એફપીઆઇનો મૂડીપ્રવાહ જળવાઈ રહેશે કારણ કે બજારમાં વિદેશી મૂડી આકર્ષવા માટે અનેક પગલાં લેવાયાં છે. એફપીઆઇ માટે કોર્પોરેટ બોન્ડ્સમાં રોકાણની મર્યાદા પણ 9 ટકાથી વધારીને 15 ટકા કરી હતી.