ચીને તાજિકિસ્તાનમાં બનાવ્યુ સિક્રેટ મિલિટરી બેઝ, પાંચ વર્ષ બાદ દુનિયાને જાણ થઈ

October 16, 2021

નવી દિલ્હી: મધ્ય એશિયામાં ચીન પોતાની વગ વધારી રહ્યુ છે અને તેના ભાગરૂપે ચીને તાજિકિસ્તાનમાં પોતાનુ ગુપ્ત સૈન્ય બેઝ તૈયાર કર્યુ છે. આ જ બેઝ પાસે રશિયાનુ જુનુ મિલિટરી બેઝ હતુ. ચીનનુ આ બેઝ પાંચ વર્ષથી કાર્યરત છે તેવો ઘટસ્ફોટ થયો છે અને અત્યાર સુધી દુનિયાને તેની ગંધ પણ આવી ન હતી. હવે સેટેલાઈટ તસવીરોમાં આ બેઝની પોલ ખુલી ગઈ છે. બીજી તરફ તાજિકિસ્તાન અને ચીને આ અહેવાલને રદિયો આપ્યો છે. જોકે એક ન્યૂઝ વેબસાઈટનો દાવો છે કે, ચીની સૈનિકો અહીંયા મોજૂદ છે અને ઘણુ બાંધકામ પણ કર્યુ છે. બેઝ પાસે વોચ ટાવર પણ બનાવાયા છે.
ચીન મધ્ય એશિયામાં પોતાની વગ વધારવામાં પડ્યુ છે. ચીને તાજિકિસ્તાન અને અફઘાનિસ્તાનના તાલિબાનો વચ્ચે સબંધો સુધારવા માટે પણ મધ્યસ્થી કરવા માંડી છે. સ્થાનિક લોકોનુ કહેવુ છે કે, અહીંયાથી ઘણી વખત ડ્રોન ઉડતા જોવા મળ્યા છે. ચીન પાસે આ બેઝ પર નજર રાખવાના ઘણા સાધનો છે. આ બેઝ પર ચીન, અફઘાન અને તાજિકિસ્તાનના અધિકારીઓ જોવા મળતા હોય છે.