જાન્યુઆરીમાં WPI ફુગાવાનો દર વધીને 3.1%

February 15, 2020

નવી દિલ્હી: ડુંગળી અને બટાટા જેવી ખાદ્ય ચીજવસ્તુઓના ભાવમાં વધારાથી જાન્યુઆરી મહિનામાં હોલસેલ પ્રાઈસ આધારિત (WPI)ફુગાવાનો દર વધીને 3.1 ટકા નોંધાયો હતો. અગાઉના મહિનામાં આ દર 2.59 ટકા હતો.

એક વર્ષ અગાઉના સમાનગાળા દરમિયાન WPI ફુગાવાનો દર 2.76 ટકા નોંધાયો હતો. જાન્યુઆરી મહિનામાં ખાદ્ય પદાર્થોના ભાવમાં 11.51 ટકાનો તોંતિંગ વધારો જોવા મળ્યો હતો જે, એક મહિના અગાઉ માત્ર 2.41 ટકા હતો. બીન ખાદ્ય પદાર્થોના ભાવ ડિસેમ્બરના 2.32 ટકાની સરખામણીમાં જાન્યુઆરીમાં 7.8 ટકાની વૃદ્ધિ જોવા મળી હતી.

સૂચિતગાળામાં ડુંગળી સહિતના શાકભાજીના ભાવમાં 52.72 ટકાની વૃદ્ધિ નોંધાઈ હતી. બટાટાના ભાવમાં પણ 37.34 ટકાની વૃદ્ધિ જોવા મળી હતી. સપ્તાહની શરૂઆતમાં રિટેલ ફુગાવો પણ 7.59 ટકાની છ વર્ષની ઊંચી સપાટીએ પહોંચી ગયો હતો. શાકભાજી સહિતના ખાદ્ય પદાર્થોના ભાવમાં જોવા મળેલા અસાધારણ વધારાથી રિટેલ ફુગાવો RBIના કમ્ફર્ટ ઝોનથી પણ વધી ગયો હતો. મે, 2014 પછીનો ફુગાવાનો આ સૌથી ઊંચો દર છે. મે, 2014માં ફુગાવાનો દર 8.33 ટકા હતો.